بمناسبة رايز اب…
سبتمبر 2013
كلمنى احمد الالفى وكنا لسه فى مراحل توقيع العقد مع الجامعة الاميركية لايجار مبنى الحرم اليونانى، الاجواء كانت لسه صعبة جدا سياسا، التحرير كان لسه بيشوف مظاهرات، وطبعا قصة ايجار الجريك كامبس نفسه كانت ومازالت قصة مجنونة وحلم لشخص عند رؤية، لما قابلت الفى وكان لسه بيفكر فى فكرة الايجار وقالي انا بافكر اجر مبنى فى وسط البلد، ايه رايك…
قلتله ياه وسط البلد فى الظروف دي … وبمنتهى الهدوء قالي اه فى شارع محمد محمود… عايز اقولك ان الكلام ده كان فيه عز احداث محمد محمود، دم، ضحايا ، غاز، مظاهرات، الشوارع حواليه كلها مقفولة، الناس اللي فيه نفسها بتمشي! المحلات كلها قافلة
الكهرباء مقطوعة
انا ذهلت، لو مش ده الجنون يبقى ايه!
قالي ” when there is blood on the street it is the time to buy”
الجملة طبعا تبان صاعقة فى مضمونها والحقيقة ان اصلها يرجع لوول ستريت وده الستريت المقصودة فى الجملة، والمعنى مفهوم انه لم يبقى فيه خسائر فيه الاسهم فده وقت كويس للشراء لانه الاسهم اكيد هتطلع … بس طبعا ده كله فى الاخر كلام عايز شجاعة وجرأة وحد عنده رؤية لما بعد الحدث…
المهم لما دخلنا المفاوضات مع الجامعة الاميركية اللي تقريبا مكنوش مصدقين ان حد مجنون ممكن يمضى معهاهم ويدفع لهم فلوس كمان، فى وقت كانت الناس بتتكلم عن قناصة فوق مبانى الجامعة الاميركية فى الفترة دي والإشاعات منتشرة
وفى التوقيت العجيب ده، الفى قالي فيه حد هيكلمك عايز يعمل معرض او مؤتمر اسمه عبد الحميد شرارة عن طلعت حرب، وسجلت نمرته، ولاقيته فعلا بيكلمنى، وحسيت يا جماعة هو فيه ايه ده مش مجنون واحد دول اتنين!
ايه يا عم شرارة موضوع ايفنت طلعت حرب ده ، قعد شرارة يكلمنى بحماس شديد عن طلعت حرب واد ايه هو حقيقى هو شايفه نموذج مثالي فى التوقيت ده للشركات الناشئة والشباب انه يشوفوا فيه نموذج للمصري الناجح واسس بنك مصر، الحماس معدي،
وفاجاءة لاقيت نفسيى متحمس معاه، المشكلة انه كان بيكلمنى كانه المبنى خلاص معانا، وعمال يرتب بقى حاجات، وهنعمل ايه فين.. بصراحة خفت اصدمه واقوله احنا لسه اصلا ممضناش مع الجامعة 😂.
وسالته الايفنت هيبقى امتى قالي ده فى عيد ميلاد طلعت حرب وهنطلعه يتكلم با الثري دي وقلتله امتى يعنى التاريخ ده قالي نوفمبر ٢٥ /٢٠١٣ يعنى بعد ٣ اسابيع…
انا بلمت كدة وقولت له… امم ٣ اسابيع.. السنة دي يعنى ! قالي اه
القصة طويلة… من يوم ما وقعنا مع الجامعة اخيرا فى مفاوضات تستحق مقالة لوحدها من اقناع مجلس الامناء فى نيويورك برؤيتنا للجريك كامبس كمنارة للشركات الناشئة والانتربنرشيب كلمات محدش كان بيتكلم عليها قوى فى الوقت و استملنا الجريك كامبس، مكنش فيه غيرى انا والفى ورحنا اخذنا المفاتيح من افراد امن الجامعة اللي تقريبا رموا المفاتيح فى حجرنا ومشيوا…
الف ميروك … وحع الدماغ ده بقى بتاعكم باي!
حالة الجريك كامبس يوم استلامه كان فى صالتين محروقين بالكامل من المولوتف ، مبانى الجريك كلها كانت مستخدمة لتخزين اثاث قديم من اثاث الجامعة، المبانى كان ينفع يتصور فيه فيلم رعب او فيلم تاريخى، الحاجات متسابة فى مكانها بقالها ٥ سنين كلها تراب.. ازاي هنستقبل ايفنت هنا اسمه رايز اب بعد ٣ اسابيع.. ده محتاج معجزة!
للحديث بقية…
صور نادرة للجريك كامبس بعد استلامه
