في حلقة جديدة من بودكاست “كن تك” الذي يقدمه الإعلامي حسن عثمان، تحدث الدكتور محمد حجازي، خبير التشريعات الرقمية والملكية الفكرية، عن التحديات القانونية اللي بتواجه الشركات الناشئة ورواد الأعمال في مصر. مؤكدًا أن البداية القانونية السليمة مش رفاهية، لكنها أساس الحماية والاستمرار.
البداية القانونية الصحيحة تحمي الفكرة من الضياع
أكد د. حجازي أن أكبر خطأ بيقع فيه الشباب المبتكر هو إنهم يبدأوا مشروعهم بدون اتفاقات قانونية واضحة.
وقال: “كتير من الشباب بيفكر في الفكرة والتسويق قبل ما يفكر في الإطار القانوني. ومع أول خلاف بين الشركاء كل المجهود بيروح هدر لأن مفيش أساس قانوني واضح”.
وأضاف أن الاستشارات القانونية لازم تكون أول خطوة قبل تأسيس الشركة، مش خطوة لاحقة، لأن الاتفاق على نسب الملكية، والإدارة، والتمويل من البداية بيمنع النزاعات المستقبلية.
الشركات الناشئة تختلف عن الشركات الصغيرة والمتوسطة
أوضح خبير التشريعات الرقمية أن الشركات الناشئة مش مجرد كيان تجاري بيبيع منتج أو خدمة، لكنها فكرة ابتكارية بتخلق سوق جديد أو بتحل مشكلة بطرق غير تقليدية.
وبيّن أن القوانين المصرية بدأت تراعي طبيعة المشاريع دي، لكن لسه محتاجة تفعيل أكبر على أرض الواقع.
وقال: “إحنا محتاجين منظومة تشريعية مرنة تتناسب مع سرعة التغير التكنولوجي، لأن الابتكار مش بيستنى تعديل القوانين”.
البيانات هي الوقود الجديد للاقتصاد الرقمي
وتحدث د. حجازي كمان عن سياسة البيانات المفتوحة اللي أطلقها المجلس الوطني للذكاء الاصطناعي برئاسة وزير الاتصالات د. عمرو طلعت، مؤكدًا إنها خطوة مهمة لدعم الابتكار.
وقال: “عدم إتاحة البيانات في الماضي كان سبب في ضياع فرص استثمارية كبيرة، لأن الشركات والمستثمرين مكانوش قادرين ياخدوا قرارات دقيقة بسبب نقص المعلومات”.
وأضاف أن السياسة الجديدة هتفتح الباب قدام الباحثين ورواد الأعمال إنهم يطوّروا حلول حقيقية مبنية على بيانات صحيحة، وده هيعزز من تنافسية السوق المصري.
وأوضح أن وجود بوابة وطنية موحدة للبيانات هيساعد على تحقيق الشفافية ويشجع المستثمرين المحليين والأجانب.
جذب الاستثمار يحتاج إلى شفافية وثقة
قال خبير التشريعات الرقمية إن المستثمر لما ييجي يدرس السوق، أول حاجة بيدور عليها هي البيانات الدقيقة.
وأضاف: “البيانات هي اللي بتخلي المستثمر يعرف هيحط فلوسه فين، ويحسب العائد والمخاطر بدقة. من غيرها القرار بيبقى مغامرة”.
وأكد أن السياسة الجديدة للبيانات المفتوحة بتعزز ثقة المستثمرين، وبتسهّل دراسة الجدوى الاقتصادية، وبالتالي هتسهم في جذب استثمارات أكبر للسوق المصري.
ضرورة التوعية داخل المؤسسات الحكومية
دعا د. حجازي إلى تكثيف حملات التوعية داخل الجهات الحكومية علشان الموظفين يعرفوا أهمية مشاركة البيانات غير الحساسة، وقال: “محتاجين تغيير في الثقافة المؤسسية، علشان قرار إتاحة البيانات ما يكونش في يد شخص واحد، لكن يكون قرار مؤسسي داخل منظومة شفافة”.
وأشار إلى أن الخطوة دي هتخلق تكامل حقيقي بين الدولة والقطاع الخاص والجامعات، وده هو الطريق لبناء اقتصاد رقمي قوي.
نصيحة خبير التشريعات لرواد الأعمال
اختتم د. حجازي تصريحاته برسالة واضحة لكل شاب عنده فكرة مشروع: “ابدأ صح… واستشير خبير قانوني قبل ما تبدأ، لأن الحماية القانونية مش رفاهية، دي هي اللي بتحافظ على مجهودك وتدي مشروعك عمر أطول”.
عن بودكاست كن تك
كن تك | KenTech Podcast هو بودكاست تقني بيقدمه الإعلامي حسن عثمان. وبيستضيف نخبة من الخبراء في التكنولوجيا وريادة الأعمال. كما أن البرنامج بيناقش قضايا التحول الرقمي، الذكاء الاصطناعي، وحماية الابتكار بلغة بسيطة قريبة من الشباب، وبيُعرض على كل المنصات الرقمية.
