كن تك يكشف أهمية البحث والتطوير في مواجهة الهجمات السيبرانية: عمرو فتحي يوضح كيف تبني منظومة دفاع متكاملة
في حلقة مميزة من بودكاست “كن تك“، كشف المهندس عمرو فتحي، مدير البحث والتطوير بشركة Fixed Solutions، عن الدور المحوري لمراكز البحث والتطوير في تعزيز أمن المعلومات، مشددًا على أن “الاستثمار في البحث والتطوير مش رفاهية، بل هو أساس التنافسية واستمرارية المؤسسات”.
البحث والتطوير في مصر… لماذا لا يزال غائبًا عن الصورة؟
أكد فتحي أن مراكز البحث والتطوير في مصر والدول العربية لا تزال “مش واخدة حقها”، موضحًا أن أغلب الشركات تركز على تقديم حلول جاهزة مبنية على تكنولوجيا غربية، “رغم إن كتير من المنتجات دي مش مناسبة للسوق العربي”. وأضاف: “حتى لو اللي هنبدأ بيه مش هو الأفضل، لازم نبدأ، وإلا هنفضل مجرد مستهلكين، والمسافة هتكبر بينا وبين باقي العالم”.
كيف تبني فريق بحث وتطوير فعّال داخل شركتك؟
أوضح ضيف البودكاست أن بناء فريق ناجح لا يعني تجميع أشخاص بنفس المهارات، وإنما التنوع هو الأساس. وقال: “مش لازم كل الفريق يبقى زي بعض، لأننا مش بنقدم المنتج النهائي. الفكرة إنك تبني نموذج بسيط يوصل الفكرة، وبعدها تطوّره للسوق”.
وشدد على أن: “أي شركة ناوية تبني منتج حقيقي لازم يكون عندها فريق بحث وتطوير مدرب ومتعدد المهارات”.
البنية التحتية القوية تبدأ من البحث والتطوير
انتقل الحوار إلى تأمين البنية التحتية الرقمية، حيث أشار فتحي إلى أن أي مؤسسة بتواجه اليوم تحديات متجددة في أمن المعلومات، ولازم تكون مرنة وجاهزة. وأوضح: “لو بتفكر تبني منظومة دفاع قوية، فمفهوم الدفاع المتعمق (Defense in Depth) هو الحل… يعني تحط أكتر من طبقة حماية، علشان حتى لو واحدة وقعت، التانية تصد”.
الهجمات السيبرانية… مسألة وقت مش احتمال
حذّر فتحي من التساهل في مواجهة التهديدات الرقمية، قائلاً: “حتى الشركات الكبيرة اتعرضت لهجمات… والسؤال مش (هل هيحصل؟)، لكن (إمتى هيحصل؟)، فلو حصل، لازم تكون جاهز بمنظومة دفاع قوية تحمي الأصول الرقمية”.
من داخل المؤسسة… الخطر الأقرب
وأضاف: “مش لازم التهديد ييجي من برة، ممكن موظف من جوه الشركة يسرّب البيانات أو يستغل ثغرة يعرفها. علشان كده لازم نشتغل على مبدأ (زيرو تراست)… مفيش ثقة مطلقة، وكل خطوة لازم تتأكد منها”.
كيف تحمي أصولك الرقمية؟
تطرق الحوار إلى مفهوم “الأصول الرقمية” وطرق حمايتها. أوضح فتحي أن أي شيء داخل الشركة له قيمة رقمية يجب اعتباره “أصل رقمي”، مثل حسابات التواصل الاجتماعي، أجهزة الموظفين، البرامج، وغيرها.
وقال: “مش هتعرف تأمن حاجة أنت مش عارف إنها موجودة… لازم تحدد الأول كل الأصول الرقمية اللي عندك. لازم تعمل تقييم دوري للمخاطر، وتشوف سيناريوهات زي: لو اللابتوب اتسرق؟ هل البيانات مشفرة؟ هل عندك خطط بديلة؟”.
